Me 1 shtator 1928 Shqipëria shpallet Monarki me Mbret Zogu-I, në 92 vjetorin e kësaj date historike Trashigimtari i Fronit Mbretëror Shqiptarë Princ Leka-II ka publikuar një mesazh për mbarë popullin Shqiptarë brenda dhe jashtë atdheut.
Me rastin e 92 vjetorit të shpalljes së Mbretërisë Shqiptare, kam kenaqësinë t’i shpreh urimet e mia mbarë Kombit Shqiptar. Për të përkujtuar këtë datë historike, po ndaj me ju momentin e shpalljes së Ahmet Zogut Mbret të Shqiptarëve!
Gjatë vitit 1920, Shqipëria po përjetonte një periudhë të zgjatur trazirash politike dhe destabiliteti.
Pas zgjedhjeve të parakohshme të 25 gushtit 1928, deputetët e parlamentit nga Skrapari propozuan që Shqipëria duhet të shpallej sërish mbretëri. Ky propozim u pranua dhe u mor në konsideratë nga Asambleja Kushtetuese.
U ngrit një Komision Statutor, i cili propozoi një ndryshim regjimi nga Republikë në Mbretëri Kushtetuese. Ky propozim u miratua nëpërmjet një votimi më 30 gusht 1928 nga Asambleja Kushtetuese, e cila e shpalli Shqipërinë Mbretëri demokratike, parlamentare dhe të trashëgueshme. Më pas u ngrit një komision i cili këtë vendim ia komunikoi Presidentit Ahmet Zogu, duke i ofruar atij fronin mbretëror.
Më 1 shtator 1928, vendimi i Asamblesë Kushtetuese hyri në fuqi. Nalt Madhnia e Tij, Zogu I, Mbreti i Shqiptarëve, mbajti këtë betim me duart mbi Bibël dhe Kuran:
“Unë, Zog I, Mbreti i Shqiptarëve, në minutën që hyp në fronin e Mbretërisë Shqiptare dhe marr në dorë pushtetet mbretërore, betohem para Zotit Fuqimadh, se do të ruaj njësinë kombëtare, pavarësinë shtetërore dhe tërësinë tokësore; gjithashtu, do ti përmbahem Statutit e do të veproj pikërisht sipas atij dhe sipas ligjeve në fuqi, duke pasur parasysh gjithmonë të mirën e popullit. Perëndia më ndihmoftë!” -përfundon mesazhin Princ Leka-II.

MEDIA INDEPENDENT